Abdixhiku tregon arsyet e moskandidimit të Veliut për kryetar të Podujevës

Kryetari i Lidhjes Demokratike të Kosovës, Lumir Abdixhiku, ka sqaruar arsyen pse Agim Veliu nuk është kandidat për komunën e Podujevës në zgjedhjet lokale që pritet të mbahen këtë vjeshtë, njofton Insajderi.

Pas mbledhjes së Kryesisë së LDK-së, Abdixhiku tha se Veliu nuk ka shprehur ambicie për të qenë kandidat, ndërsa ka theksuar se kjo parti ka zgjedhur kandidatët të cilët i kanë gjasat më të larta për të fituar.

VIDEO:

“Ne kemi zgjedhur kandidatët që kanë gjasa më të larta dhe Veliu nuk ka shprehur ambicie për të qenë kandidat për kryetar të komunës, kemi zgjedhur Hysenin që do ta rikthejë Podujevën sa më parë. Të tjerët do zyrtarizohen në ditët në vijim”, ka thënë Abdixhiku.

I pari i LDK-së ka shtuar se pritshmëritë e partisë për këto zgjedhje janë të lartë, ndërsa u shpreh bindshëm në fitoren e shumicës së komunave.

“Besojmë se do të jemi fitues në pjesën më të madhe të komunave. Kemi organizim të jashtëzakonshëm nëpër degët tona, kemi frymë të rikthimit të LDK-së. Rezultati do të jetë padyshim pozitiv”, ka thënë ai.

Abdixhiku u përgjigj edhe për rikandidimet, për të cilat tha se komunat në të cilat kanë udhëhequr deri tash e kanë pasur “udhëheqjen më të mirë që e ka pasur Kosova”. /Insajderi.com