Haxhiu: Për Haradinajn kam votë, por jo për Osmanin

Ish deputeti i Partisë Demokratike të Kosovës dhe kandidati për deputet nga kjo parti, Bekim Haxhiu, ka thënë se s’ka asnjë logjikë që PDK-ja të rrijë në sallën e Kuvendit dhe t’ia bëjë votat për presidente, Vjosa Osmanit, njofton Insajderi.

“Ajo (Vjosa Osmani) sapo pati hyrë në Kuvend e pati hequr fotografinë e Thaçit që ishte president i zgjedhur. PDK-ja nuk i ka borxh as zotit Kurtit e as zonjës Osmani”, tha Haxhiu.

VIDEO:

Sipas tij, nëse Kurti dëshiron ta bëjë presidente Osmanin, ai duhet t’ia sigurojë votat asaj.

“Nëse nuk ia siguron votat zonjës Osmani, vendi do të shkojë në zgjedhje sërish”, ka thënë Haxhiu në ATV.

Tutje ai tha se çështja e zgjedhjes së presidentit nuk është diskutuar në PDK, por sipas tij, bëhet fjalë për parime.

“Nëse dëshirojnë të zgjedhim një kandidat konsensual për president, atëherë mund të flasim”, shtoi ai.

I pyetur për kandidaturën e Ramush Haradinajt për president dhe atë të Murat Jasharit si kandidat i mundshëm konsensual, Haxhiu u përgjigj kështu: “Për familjen Haradinaj dhe për familjen Jashari, unë në Kuvend do të kem votë gjithmonë, pavarësisht si do të jetë vendimi i partive”./Insajderi.com