Kandiq kritikon heshtjen e krerëve të Serbisë pas dënimit të Mladiqit

Dënimi

Ish-drejtoresha e Fondit për të Drejtën Humanitare dhe aktivistja për të drejtat e njeriut, Natasha Kandiq, ka kritikuar krerët institucional të Serbisë për heshtjen pas konfirmimit të dënimit të përjetshëm për Ratko Mladiqin.

VIDEO:

Lideri i forcave serbe në Bosnjë, u shpall fajtor edhe në shkallën e dytë dhe u dënua për 10 nga 11 pikat e aktakuzës, njëjtë si në shkallën e parë.

Presidenti i Serbisë, Aleksandar Vuçiq, kryeministrja Ana Bërnabiq, kryeparlamentari Ivica Daçiq dhe ministra në Qeverinë e Serbisë nuk kanë reaguar ende për dënimin që dha sot Tribunali i Hagës.

“Ratko Mladiq u dënua, kreu politik në Serbi po hesht, pasi Gjykata nuk e lidhi Serbinë me UZP-në (ndërmarrje e përbashkët kriminale). Por kjo është fitore e Pirros. Nuk do të kishte as Srebrenicë e as Tomashicë nëse Serbia nuk do të përkrahte financiarisht, ushtarakisht, moralisht e ideologjikisht ushtrinë, gjeneralët e të cilës janë dënuar për gjenocid”, ka shkruar Kandiq në Twitter.

Mladiq u dënua me burgim të përjetshëm, ndër të tjera edhe për gjenocidin ë Srebrenicë më 1995, kur u vranë mbi 8000 burra të paarmatosur myslimanë.