Kryeministër, gjyqtarët të varen!”/ Protestë për Sabrinën

Protesta në Tiranë

Protestuesit në Tiranë kanë marshuar drejt Ministrisë së Drejtësisë me thirrjen “Drejtësi për Sabrinën!”

Protesta e paralajmëruar për 23-vjeçaren e vrarë nga ish-bashkëshorti në fshatin Zhupan në Fier vijon ende në Tiranë.

Qytetarët me pankarta në duar janë shprehur përmes mesazheve se duhet të vihet drejtësia për viktimën dhe shumë prej grave që janë dhunuar apo vrarë brutalisht nga bashkëshortët e tyre.

“Vrasja e vajzave dhe grave është pandemi, ku janë vaksinat?”, shkruhej në njërën prej pankartave.“Harram tamli nanës”

VIDEO:

“Kryeministër në fillim duhen varur në mes të Tironës policë, gjyqtarë, prokurororë, psikologë”

Sabrina Bengaj është viktima e 14 grua për vitin 2021 që u vra nga bashkëshorti i saj në mënyrë të pafajshme.

Protesta e sotme nuk është vetëm për Sabrinën, por për të gjitha gratë e dhunuara dhe një thirrje për institucionet që bëhen palë me vrasësit duke i lënë të lirë.

Viktima Sabrina Bengaj dhe autori Elton Metaj

Sabrinës i përfundonte urdhri i mbrojtjes, mirëpo ndonëse e kishte një urdhër të tillë, nuk arriti që ta mbronte nga vdekja.

Vendimin për t’u pajisur me urdhrin e mbrojtjes e ka dhënë gjyqtari Alfred Konomi.

Në dokumentet e siguruar nga Top Channel mësohet se Elton Bengaj Metaj dhe Sabrina Bengaj ishin ndarë prej gati një viti.

Në janar, prokurori i çështjes, Çlirim Sina pa pasur pretendim nga familjarët apo i pandehuri dhe ka kërkuar në gjykatë që Elton Metaj të mos qëndrojë në qelinë e paraburgimit të Fierit, por të shkojë në spitalin e burgut të Zaharisë, për ata që janë me probleme të shëndetit mendor, bazuar mbi një ekspertizë nga mjekë të Institutit Ligjor.

Autori, Elton Metaj

Gjykata me një vendim të gjyqtarit Piro Sota, kishte vendosur më 1 mars 2021 caktimin si masë mjekësore ndaj Elton Metaj Bengaj, atë të ‘mjekimit të detyruar në një institucion mjekësor’.

Po kështu, kishte vendosur dhe pushimin e çështjes penale të 21.09.2020 për veprat ‘Dhunë në familje’, ‘Kundërshtim i punonjësit të policisë së rendit publik’, ‘Mbajtja pa leje dhe prodhimi i armëve, armëve shpërthyese dhe i municionit’.

Ndërsa më 26 korrik 2021, po Gjykatësi Piro Sota ka vendosur zëvendësimin e masës mjekësore ndaj Metaj, nga ‘mjekim i detyruar në një institucion mjekësor’ në masën mjekësore ‘mjekim i detyruar ambulator’ nën kujdesin e babait të tij Bashkim Meta.

Një herë në muaj, sipas vendimit, 31-vjeçari duhet të paraqitej pranë mjekut neuro-psikiatër në Poliklinikën e Specialiteteve Fier.

Po edhe këto masa dhe vendime gjykatash nuk mundën të parandalonin krimin e rëndë në Fier që i mori jetën një nëne të re, të një vajze 3-vjeçare.

Kujtojmë se Inspektori i Lartë i Drejtësisë ka nisur hetimet për veprimet e magjistratëve në Fier, të cilët kanë liruar nga burgu vrasësin e 23-vjeçares, Sabrina Bengaj./TCh