Kryetari i KQZ-së thotë se në takimin me Osmanin para një jave u fol edhe për shtyrjen e zgjedhjeve

<!–

–>

Kryetari i Komisionit Qendror të Zgjedhjeve, Kreshnik Radoniqi, ka deklaruar se në takimin me Presidenten Vjosa Osmani, që është mbajtur para një jave, është hapur edhe çështja e shtyrjes dhe zvogëlimi të fushatës zgjedhore , raporton Express

Në mbledhjen e sotme të KQZ-së, kryetari Radoniqi është pyetur nga Florian Dushi i LDK-së dhe Arianit Elshani i PDK-së, se çfarë është diskutuar në takimin që ai ka pasur me Presidenten Osmani.

VIDEO:

Kreu i KQZ-së, ka deklaruar se përveç tjerash, në takimin me Presidenten Osmani është ngritur edhe çështja e shtyrjes së zgjedhjeve.

“Takimi ka qenë zyrtar, ka qenë një takim i kërkuar nga unë, qëllimi i takimit ka qenë për hapësira të objektit për staf të sekretariatit, ne kemi marrë një vendim prej ish-ministrit Veliu që aneksi i kësaj ndërtese t’i jepet KQZ-së si pjesë e ndërtesës për nevojat e stafit, ne kemi komunikuar me ministrinë e MPB-së, por që s’kemi pranuar përgjigje prej kohës kur është marrë ai vendim. Qëllimi im ka qenë që të ketë një komunikim me ministrin, sepse ata nuk na përgjigjen lidhur me këtë objekt. Ne i kemi kushtet e pavolitshme. Çështje tjetër që është diskutuar ka qenë edhe nevoja për me i vaksinua stafin që do të punojnë në ditën e zgjedhjeve, që janë 25 mijë apo rreth 30 mijë persona që do të jenë të angazhuar të punojnë në ditën e zgjedhjeve. Është ngritur edhe çështja e shtyrjes apo zvogëlimit të fushatës zgjedhore por në këtë çështje unë personalisht nuk kam dhënë mendim, as nuk jam marrë me këtë çështje. Çështja e fushatës, edhe mediat që më kanë pyetur, gjithnjë kam thënë se nuk kemi kërkesë për me e shkurtua fushatën dhe është çështje ligjore kohëzgjatja e fushatës.

Sa i përket shtyrjes së datës së zgjedhjeve, ajo absolutisht nuk është s’është as në kompetencë timen, as të KQZ-së, as nuk e parasheh diku Ligji këtë çështje, unë nuk kam diskutua. E di që ndoshta e keni këtë çështje nën interesim, por sa më përket mua, unë nuk e kam diskutuar këtë çështje, është ngritur çështja, por nuk kam jep as mendim as nuk kam interes me jep mendim për këtë…”, ka deklaruar Radoniqi.

Takimi i Radoniqit me Presidenten Osmani është mbajtur më 6 shtator. Për këtë takim ka njoftuar edhe Presidenca, në faqen zyrtare.

“Kryetari i KQZ-së, e njoftoi Presidenten Osmani për përgatitjet, të cilat i ka bërë KQZ-ja për organizimin e zgjedhjeve lokale. Presidentja Osmani ka potencuar rëndësinë e sigurimit dhe ruajtjes së integritetit të procesit zgjedhor, lehtësimit të pjesëmarrjes sa më të madhe të qytetarëve në ditën e zgjedhjeve, por mbi të gjitha rëndësinë e ruajtjes së shëndetit të qytetarëve. Ndërkaq kryetari Radoniqi tha se do të angazhohen maksimalisht për mbarëvajtjen e procesit zgjedhor përbrenda kompetencave të KQZ-së”, thuhej në njoftimin e Presidencës.

Më 10 shtator, Presidentja Osmani, ka ftuar partitë për të diskutuar lidhur me shtyrjen e zgjedhjeve, ide kjo që u hodh në publik nga kryetari i Kuvendit dhe numri dy i VV’së, Glauk Konjufca.

Osmani ka thirrur një takim konsultativ me partitë në mënyrë që të diskutohet për shtyrjen e zgjedhjeve, gjithmonë me rekomandimin e IKSHPK’së.

Një ditë pas ftesës së Osmanit për partitë politike, Instituti Kombëtar i Shëndetësisë Publike të Kosovës doli me rekomandim për shtyrjen e zgjedhjeve.

Kështu është konstatuar në letrën që IKSHP-ja i ka dërguar presidentes së Kosovës, Vjosa Osmanit.

Në letër thuhet se mbajtja e zgjedhjeve paraqet rrezik për përhapjen dhe rritjen e infeksionit me COVID-19 e si pasojë edhe rritje të rrezikut të rasteve me fatalitet.

“Në bazë të analizës së situatës aktuale epidemiologjike të rasteve me COVID-19, bazuar në raportet e rasteve të hospitalizuara dhe vdekjeve nga SHSKUK dhe spitalet rajonale, dhe profeksioneve për muajin shtator deri në fillim të tetorit, Task Team i IKSHPK-së është i mendimit se mbajtja e procesit zgjedhor, i cili ngërthen në vete tubime publike dhe grumbullim të qytetarëve, paraqet rrezik për përhapjen dhe rritjen e infeksionit me COVID-19 e si pasojë edhe rritje të rrezikut të rasteve me fatalitet. Prandaj, meqenëse procesi zgjedhor mund të ketë ndikim të shtuar në përhapjen dhe rritjen e rasteve me COVID-19, rekomandojnë shtyrjen e procesit zgjedhor, përkatësisht ndalimin e aktiviteteve publike, grumbullimit të qytetarëve dhe tubimet publike të të gjitha llojeve dhe natyrave pa përjashtim, deri në vlerësimin epidemiologjik të radhës”, ka thënë në letrën për presidenten IKSHPK-ja.