Larg parashikimeve të Qeverisë Kurti, FMN tregon për rritjen ekonomike në Kosovë gjatë vitit 2021

<!–

–>

Fondi Monetar Ndërkombëtar ka publikuar vlerësimin e vitit 2021 për Kosovën. Në këtë vlerësim konstatohet se ndikim të jashtëzakonshëm në rritjen ekonomike për vitin 2021 kanë pasur hyrjet nga diaspora dhe politikat fiskale të shtetit.

VIDEO:

Një prej institucioneve më kredibile ndërkombëtare, Fondi Monetar Ndërkombëtar ka publikuar vlerësimin e vitit 2021 për Republikën e Kosovës. Në një komunikatë për media kanë bërë të ditura të gjitha detajet për vitin 2021 që ndërlidhen me rritjen ekonomike, papunësinë, borxhin publik e çështje të tjera.

Në këtë vlerësimthuhet se ekonomia e Kosovës po rikthehet nga një rënie e madhe që kishte përjetuar në vitin 2020, vit ky kur shpërtheu pandemia. Në këtë ngritje ekonomike thuhet se ka pasur një ndikim të jashtëzakonshëm mbështetja e diasporës.

“Pas tkurrjes me 5.3 % në vitin 2020, GDP reale parashikohet të rritet me 7.5 % në vitin 2021”, thuhet në raport.

Rezultati i mirë në vitin 2021 thuhet se ka ardhur si rezultat i përgjigjes fiskale ndaj pandemisë, gjë që ka siguruar rrugë për shpëtim për familjet dhe bizneset dhe ka zbutur ndikimin e goditjes për ata që janë prekur më së shumti nga pandemia.

Impakt të jashtëzakonshëm thuhet se ka pasur edhe hyrja e jashtëzakonshme nga diaspora dhe gjithashtu rritja e kredive për sektorin privat.

Ndërkohë parashikohet që viti 2022 të jetë më sfidues. Sipas FMN-së aktiviteti ekonomike parashikohet të rritet me 3.8 % në vitin 2022, rritje kjo e nxitur pjesërisht nga momentumi i fort ekonomik në vitin 2021.

Pasiguria rreth perspektivës për vitin 2022 mbetet e lartë dhe këtë pasiguri më së shumti e përfaqëson rreziku për vazhdimin e pandemisë.