Ministria e Shëndetësisë: Rastet me COVID-19 po shtohen, vaksinohuni!

Ministria e Shëndetësisë

Ministria e Shëndetësisë ka apeluar te qytetarët që të vaksinohen kundër koronavirusit, pasi në vendin tonë ka rritje të rasteve të personave të prekur me virus.

Në apelin e Ministrisë së Shëndetësisë thuhet se rritja progresive e rasteve me COVID-19 dhe prania e theksuar e variantit Omicron vë në pah rëndësinë e madhe që ka vaksinimi si mënyra më e thjeshtë për parandalimin e infeksioneve dhe mbrojtjen nga format e rënda të sëmundjes.

VIDEO:

“Vaksinohuni plotësisht, duke marrë edhe dozën përforcuese të vaksinës kundër COVID-19. Ju mund të vaksinoheni në të njëjtën kohë dhe në të njëjtën qendër edhe me vaksinën kundër Gripit sezonal”, thuhet në apelin e Ministrisë së Shëndetësisë.

Më tej MSh thotë se është “një rrugë e dy mundësi: Vaksinë kundër COVID-19 dhe vaksinë kundër Gripit sezonal!”

Ministria e Shëndetësisë në Kosovë, ka njoftuar se të premten, më 14 janar, janë regjistruar 585 raste të reja me koronavirus, pas testimit të 6.589 mostrave.

Shkalla e pozitivitetit nga mostrat e marra është 8.87 për qind. Në 24 orët e fundit nuk janë regjistruar viktima.

Autoritetet shëndetësore kanë njoftuar edhe se 57 persona janë shëruar derisa 3,339 persona janë ende aktivë në koronavirus.

Prej shpërthimit të pandemisë në mars të vitit 2020, autoritetet kosovare kanë regjistruar mbi 163.000 raste të infektimit.

Prej tyre 2,994 persona kanë vdekur.

Kosova ka nisur fushatën e vaksinimit kundër koronavirusit në mars të vitit të kaluar.

Prej atëherë janë dhënë mbi 1.7 milion doza të vaksinës.

Qytetarët në Kosovë mund të marrin vaksina të kompanive: Pfizer/BioNTech dhe AstraZeneca.