Mori veturën e ish të dashurit e u aksidentua me të, gjykata merr vendim për gruan nga Gjakova

Gjakovë

Gjykata Themelore në Gjakovë ka shqiptuar urdhër ndëshkimor ndaj të akuzuarës për marrje në posedim të pasurisë së luajtshme, D.P.

VIDEO:

Sipas aktgjykimit të përpiluar nga gjykatësja Ilirjana Hoti, gjykata e ka pranuar kërkesën e Prokurorisë Themelore në Gjakovë që ndaj të akuzuarës të shqiptohet urdhër ndëshkimor, duke e dënuar kështu të akuzuarën me 600 euro gjobë.

Gjobën e akuzuara është e obliguar që ta paguaj në afat prej 15 ditësh, nga dita e plotfuqishmërisë së këtij aktgjykimi, raporton “Betimi për Drejtësi”.

Ndryshe, sipas aktakuzës së Prokurorisë Themelore në Gjakovë, D.P. po akuzohet se më 1 nëntor 2020, në ora 00:09, në Gjakovë, me dashje e merr pasurinë e luajtshme të të dëmtuarit F.Gj, pa qëllim të përvetësimit dhe atë veturën e tipit “Audi A7”.

Tutje, sipas aktakuzës, ajo këtë e ka bërë në atë mënyrë që pasi që kishte qenë në lidhje dashurie me të dëmtuarin rreth një vit, ndërsa kohët e fundit raportet i kishin prishur, natën kritike derisa e akuzuara ishte me shoqen e saj A. B. duke lëvizur me automjetin e tyre, e vëren veturën e të dëmtuarit e cila ishte e ndezur ku pastaj edhe ndalet afër saj, me ç‘rast e akuzuara afrohet dhe fillimisht e shikon se a është i dëmtuari në veturë e pastaj hip në të, e merr veturën dhe pasi i bën disa xhiro në qytet e merr shoqen e saj dhe niset në drejtim të Prizrenit dhe pasi mbërrin në fshatin Gradish, nga shpejtësia e madhe e humb kontrollin dhe përfundon jashtë rrugës.

Për këtë, ajo po akuzohet se ka kryer veprën penale “marrja në posedim e pasurisë së luajtshme”, nga neni 319 paragrafi 1 të KPRK-së.