Rusia përforcon ushtrinë në Armeni, afër kufirit me Azerbajxhanin

Ushtria ruse

Ushtria ruse ka marrë nën kontroll dy zona të reja në jug të Armenisë, afër kufirit me Azerbajxhanin si “garanci shtesë e sigurisë”, raportuan agjencitë ruse të lajmeve, duke e cituar kryeministrin armen në detyrë, Nikol Pashinian.

VIDEO:

Kjo lëvizje i jep Moskës ndikim më të madh në rajonin ku ka dërguar trupa shtesë vitin e kaluar për ta ruajtur paqen, sipas marrëveshjes së armëpushimit që i dha fund luftës gjashtëjavore, gjatë së cilës forcat azere shënuan fitore territoriale ndaj armenëve etnikë.

Rusia është aleate e Armenisë dhe ka një bazë ushtarake në këtë shtet. Moska ka dërguar 2.000 trupa paqeruajtëse në enklavën e Nagorno-Karabakut, sipas marrëveshjes që u nënshkrua nga palët në nëntor të vitit të kaluar.

“Dy bastione të bazës ushtarake ruse të 102-të u vendosën në rajonin Syunik. Kjo është një garanci shtesë e sigurisë jo vetëm për rajonin Syunik por për Armeninë”, citohet të ketë thënë kryeministri armen.

Syuniku është një rrip strategjik i Armenisë që ndodhet mes Azerbajxhanit, enklavës azere të Nakçivanit dhe Iranit. Ministri armen i Mbrojtjes kishte deklaruar në muajin shkurt se Armenia dëshiron që Rusia ta zgjerojë praninë e saj ushtarake dhe të vendosë trupa më afër Azerbajxhanit, shkruan Free Europe.